ಅಧ್ಯಾಯ ೧ • ಮರಡಿಪುರದಲ್ಲಿ ಜನನ, ಕೃಷಿ ಹಿನ್ನೆಲೆ & ಬಾಲ್ಯದ ಶಿಕ್ಷಣ (1984)
ಹುಟ್ಟು ಮತ್ತು ಬಾಲ್ಯದ ಶೈಕ್ಷಣಿಕ ಹೆಜ್ಜೆಗಳು: ಮರಡಿಪುರ, ಬೆಳ್ಳೂರು ಬಿಜಿಎಸ್
ಸಂತೋಷ್ ತಿಮ್ಮೇಗೌಡ ಎಂಬ ಹೆಸರಿನವನಾದ ನಾನು, ಮಂಡ್ಯ ಜಿಲ್ಲೆ ನಾಗಮಂಗಲ ತಾಲೂಕು, ಹೊಣಕೆರೆ ಹೋಬಳಿಯ ಮರಡಿಪುರ ಎಂಬ ಚಿಕ್ಕ ಗ್ರಾಮದಲ್ಲಿ ಶ್ರೀಮತಿ ಬೋರಮ್ಮ ಮತ್ತು ಶ್ರೀ ಕುಚೇಲೇ ಗೌಡ ಎಂಬ ದಂಪತಿಗಳ ಪುತ್ರನಾಗಿ 15/05/1984 ರಲ್ಲಿ ಜನಿಸಿದೆ.
ಬ್ರಹ್ಮದೇವರ ಹಳ್ಳಿಯ ಸರಕಾರಿ ಹಿರಿಯ ಪ್ರಾಥಮಿಕ ಮತ್ತು ಪ್ರೌಢಶಾಲೆಯಲ್ಲಿ ಅತ್ಯುತ್ತಮ ಅಂಕಗಳೊಂದಿಗೆ ಉತ್ತೀರ್ಣನಾಗಿ, ನಂತರ ಉನ್ನತ ಶಿಕ್ಷಣಕ್ಕಾಗಿ ನಾಗಮಂಗಲ ತಾಲೂಕು ಬೆಳ್ಳೂರಿನ ಬಿಜಿಎಸ್ (BGS) ವಿದ್ಯಾಸಂಸ್ಥೆಯಲ್ಲಿ ಶಿಕ್ಷಣ ಪಡೆದಿರುತ್ತೇನೆ.
"ಮಣ್ಣಿನ ಮಗನಾಗಿ ಜನಿಸಿದ ನನಗೆ ಹಳ್ಳಿಯ ಕೃಷಿ ಪರಿಸರವೇ ಬಾಲ್ಯದ ಮೊದಲ ಮತ್ತು ನಿಜವಾದ ಪಾಠಶಾಲೆಯಾಗಿತ್ತು."
ಅಧ್ಯಾಯ ೨ • ತಾಯಿಯ ಅಕಾಲಿಕ ಅಗಲಿಕೆ, ಕುಟುಂಬದ ಸಂಕಷ್ಟ & ಸಾಂಪ್ರದಾಯಿಕ ಕೃಷಿಯ ದಿನಗಳು
ಕಣ್ಣೀರಿನ ಸಂಕಷ್ಟ, ಶಿಕ್ಷಣ ಮೊಟಕು & ತಂದೆಯೊಂದಿಗೆ ಸಾಂಪ್ರದಾಯಿಕ ಬೇಸಾಯ
ನಾವು ಮೂಲತಃ ಬಡ ರೈತ ಕುಟುಂಬ. ಶಿಕ್ಷಣ ಪಡೆಯುತ್ತಿದ್ದ ಇದೇ ಸಂದರ್ಭದಲ್ಲಿ ನಮ್ಮ ತಾಯಿ ಶ್ರೀಮತಿ ಬೋರಮ್ಮನವರು ಕೃಷಿ ಕಾಯಕದಲ್ಲಿ ತೊಡಗಿದ್ದ ಸಂದರ್ಭ ಹಾವು ಕಚ್ಚಿ ಸಾವನ್ನಪ್ಪುತ್ತಾರೆ... ನನಗೆ ಮೂರು ಜನ ಅಕ್ಕಂದಿರು ಮತ್ತು ಒಬ್ಬಳು ತಂಗಿ ಇದ್ದರು. ಈ ತಾಯಿಯ ಅಕಾಲಿಕ ಅಗಲಿಕೆ ಹಾಗೂ ಕುಟುಂಬದ ಅನಿವಾರ್ಯ ಪರಿಸ್ಥಿತಿಯಿಂದ ನನ್ನ ವಿದ್ಯಾಭ್ಯಾಸವನ್ನು ಅರ್ಧಕ್ಕೇ ಮೊಟಕುಗೊಳಿಸಬೇಕಾಯಿತು.
ನಾನು ಅಂದೇ ಯೋಚಿಸಿದೆ—ನನಗಿರೋದು ಒಂದೇ ದಾರಿ, ಅಪ್ಪ ಹಾಕಿದ ಆಲದ ಮರದಂತೆ ನಮ್ಮ ತಂದೆಗೆ ಎರಡು ಎಕರೆ ಪಿತ್ರಾರ್ಜಿತ ಆಸ್ತಿ ಒಂದು ಕೊಳವೆ ಬಾವಿ ಇತ್ತು. ಅದರಲ್ಲಿ ನಮ್ಮ ತಂದೆ ಜೊತೆ ಸೇರಿ ಕೃಷಿ ಚಟುವಟಿಕೆಯಲ್ಲಿ ತಂದೆಯ ಮಾರ್ಗದರ್ಶನ ಪಡೆದು ಅವರ ಅನುಸರಿಸಿದ್ದ ಸಾಂಪ್ರದಾಯಿಕ ಕೃಷಿಯನ್ನು ನಾನು ಸಹ ಐದು ವರ್ಷಗಳ ಕಾಲ ತೊಡಗಿದೆ. ಅದರಲ್ಲಿ ಊಟಕ್ಕೆ ತೊಂದರೆ ಇಲ್ಲದಿದ್ದರೂ, ಹಣಕಾಸಿಗೆ ತುಂಬಾ ಬಡತನ ನಮ್ಮನ್ನು ಕಾಡತೊಡಗಿತು.
"ತಾಯಿಯ ನೆನಪು ಮತ್ತು ಕುಟುಂಬದ ಜವಾಬ್ದಾರಿ ನನ್ನನ್ನು ಎದೆಗುಂದಿಸದೆ, ಮಣ್ಣಿನಲ್ಲೇ ಬದುಕು ಕಟ್ಟಿಕೊಳ್ಳುವ ದೃಢ ಸಂಕಲ್ಪ ನೀಡಿತು."
ಅಧ್ಯಾಯ ೩ • ವೈಜ್ಞಾನಿಕ ಕ್ರಾಂತಿ — ಸಮಗ್ರ ಮಿಶ್ರ ಬೆಳೆ ಪದ್ಧತಿಯಲ್ಲಿ ೭-೮ ವಿಧದ ಆದಾಯ
ಸಾಂಪ್ರದಾಯಿಕ ಪದ್ಧತಿ ತ್ಯಜಿಸಿ ಮಣ್ಣು-ನೀರು ಪರೀಕ್ಷೆ & ೭-೮ ವಿಧದ ನಿರಂತರ ಆದಾಯ
ಹೀಗೆ ಮುಂದುವರೆದರೆ ನಾನು ಕೃಷಿಯಲ್ಲಿ ಏನು ಸಾಧಿಸಲು ಸಾಧ್ಯವಾಗುವುದಿಲ್ಲ ಎಂದು ತಿಳಿದು, ಅಂದು ನಮ್ಮ ಜಮೀನಿನಲ್ಲಿ ಸಾಂಪ್ರದಾಯಿಕ ಕೃಷಿಯನ್ನು ಬಿಟ್ಟು, ವೈಜ್ಞಾನಿಕವಾಗಿ, ಮಣ್ಣು ನೀರು ಪರೀಕ್ಷೆ ಆಧಾರದ ಮೇಲೆ ಸಾವಯವಕ್ಕೆ ಹೆಚ್ಚು ಹೊತ್ತುಕೊಟ್ಟು ಒಂದೇ ಜಮೀನಿನಲ್ಲಿ ಸಮಗ್ರ ಮಿಶ್ರ ಬೆಳೆ ಪದ್ಧತಿಯನ್ನು ಅಳವಡಿಸಿದೆ.
ಒಂದೇ ಸಮಯ, ಒಂದೇ ಖರ್ಚು, ಒಂದೇ ನೀರು ಖರ್ಚು ಮಾಡಿ, ಏಳರಿಂದ ಎಂಟು ವಿಧವಿಧದ ಆದಾಯ ಬರುವ ಹಾಗೆ ಸೊಪ್ಪು, ತರಕಾರಿ, ತೆಂಗು, ಅಡಿಕೆ, ಬಾಳೆ, ಹಣ್ಣಿನ ಗಿಡಗಳು, ಅರಣ್ಯ ಗಿಡಗಳು, ಔಷಧೀಯ ಗಿಡಗಳನ್ನು ಬೆಳೆದು ಉತ್ತಮ ಇಳುವರಿಯೊಂದಿಗೆ ಅಧಿಕ ಲಾಭವನ್ನು ಸಹ ಗಳಿಸಿದೆ. ಎಲ್ಲಾ ತರಹದ ಸೊಪ್ಪು ತರಕಾರಿಗಳನ್ನು ರಿಲಯನ್ಸ್ ರಿಟೇಲ್ ಲಿಮಿಟೆಡ್ ಕಂಪನಿಗೆ ಮುಂಗಡ ಬುಕಿಂಗ್ ನೊಂದಿಗೆ ನೇರ ಮಾರಾಟ ಮತ್ತು ಆನ್‌ಲೈನ್ ಮೂಲಕ ಎಲ್ಲ ಉತ್ಪನ್ನಗಳನ್ನು ಮಾರಾಟ ಮಾಡಿದ್ದರಿಂದ ನೇರವಾಗಿ ನಮ್ಮ ಖಾತೆಗೆ ಹಣ ಉಳಿತಾಯ ಹೆಚ್ಚಾಗಿತ್ತು, ಇದರಿಂದ ಮಧ್ಯವರ್ತಿಗಳನ್ನು ತಪ್ಪಿಸಿದವು ಮತ್ತು ಮಾರುಕಟ್ಟೆಗೆ ಹೋಗುತ್ತಿದ್ದ ಸಮಯವೂ ಉಳಿಯಿತು. ಇದನ್ನು ಗಮನಿಸಿದ ಸ್ಥಳೀಯ ರೈತರು ಮತ್ತು ಕೃಷಿ ಅಧಿಕಾರಿಗಳು ನಮ್ಮ ಜಮೀನಿಗೆ ಭೇಟಿ ನೀಡಿ ನಾವು ಬೆಳೆದಿರುವ ಮಿಶ್ರ ಸಮಗ್ರ ಕೃಷಿ ಪದ್ಧತಿಯನ್ನು ನೋಡಿ ಅವರು ನನ್ನನ್ನು ಪ್ರೋತ್ಸಾಹಿಸುವುದರ ಜೊತೆಗೆ ಇತರೆ ರೈತರಿಗೂ ತಿಳಿಸಿ ಅವರು ಅಳವಡಿಸಿಕೊಳ್ಳುವಂತೆ ಮಾರ್ಗದರ್ಶನ ನೀಡಿದರು.
"ಒಂದೇ ಭೂಮಿ, ಒಂದೇ ಹನಿ ನೀರು, ಏಳೆಂಟು ಆದಾಯ — ಇದುವೇ ಸಮಗ್ರ ಮಿಶ್ರ ಬೇಸಾಯದ ನಿಜವಾದ ಚಮತ್ಕಾರ."
ಅಧ್ಯಾಯ ೪ • ೧೦ ಕುಂಟೆ ಬಂಜರು ಭೂಮಿಯಲ್ಲಿ 'ಮಿನಿ ಕೃಷಿ ವಿಶ್ವವಿದ್ಯಾನಿಲಯ'
ಜೀರೋ-ವೇಸ್ಟ್ ಕಾಂಪೋಸ್ಟ್, ವೈರಲ್ ವಿಡಿಯೋಗಳು & ರಿಲಯನ್ಸ್ ರಿಟೇಲ್ ನೇರ ಮಾರುಕಟ್ಟೆ
ನಮ್ಮ ಒಂದು ಬದಲಾವಣೆ ನೂರಾರು ಜನರಿಗೆ ಮಾರ್ಗದರ್ಶನವಾಗಿದ್ದನ್ನು ಕಂಡು, ಕೃಷಿಯಲ್ಲಿ ಇನ್ನು ಹೆಚ್ಚು ಹೆಚ್ಚು ಬದಲಾವಣೆಯನ್ನು ತರಬೇಕೆಂಬುದು ನನ್ನಲ್ಲಿ ಹಂಬಲ ಹೆಚ್ಚಾಯಿತು. ಇದನ್ನೇ ಮೂಲ ಬಂಡವಾಳವನ್ನಾಗಿ ಇಟ್ಟುಕೊಂಡು, ಕೃಷಿ ಅಧಿಕಾರಿಗಳು ಮತ್ತು ಕೃಷಿ ವಿಶ್ವವಿದ್ಯಾನಿಲಯದ ವಿಜ್ಞಾನಿಗಳ ಸಲಹೆ ಮಾರ್ಗದರ್ಶನದಲ್ಲಿ ವೈಜ್ಞಾನಿಕವಾಗಿ ತರಬೇತಿ ಪಡೆದು, ೧೦ ಕುಂಟೆ ಬಂಜರು ಭೂಮಿಯಲ್ಲಿ, ಅಣಬೆ ಕೃಷಿ, ಕೋಳಿ ಸಾಕಾಣಿಕೆ, ಆಡು-ಕುರಿ ಸಾಕಾಣಿಕೆ, ಜೇನು ಸಾಕಾಣಿಕೆ, ಅಜೋಲ ಬೇಸಾಯ, ಹಸು-ಎಮ್ಮೆ ಸಾಕಾಣಿಕೆ ಪ್ರಾರಂಭಿಸಿದೆ.
ಜೊತೆಗೆ ಕೃಷಿ ಮೂಲದಿಂದ ಬರುವ ಎಲ್ಲಾ ತ್ಯಾಜ್ಯಗಳನ್ನು ಪರಿಸರಕ್ಕೆ ಹಾನಿಯಾಗದಂತೆ ನೈಸರ್ಗಿಕವಾಗಿ ಬಳಸಿ ಉತ್ತಮ ಗುಣಮಟ್ಟದ ಕಾಂಪೋಸ್ಟ್ ತಯಾರಿಕೆಯನ್ನು ಮಾಡಿ, ಈ ಗೊಬ್ಬರವನ್ನು ಮತ್ತೆ ನಮ್ಮ ಜಮೀನಿಗೆ ಮರುಬಳಕೆ ಆಗುವಂತೆ ಅಳವಡಿಸಿಕೊಂಡೆ. ನಮ್ಮಲ್ಲೇ ಉತ್ಪತ್ತಿಯಾಗುವ ಎಲ್ಲಾ ಸೊಪ್ಪು, ತರಕಾರಿ, ಅಣಬೆ, ಕೋಳಿ, ಕುರಿ, ಜೇನು, ಅಜೋಲ, ಕಾಂಪೋಸ್ಟ್ ಎಲ್ಲವನ್ನೂ ರಿಲಯನ್ಸ್ ರಿಟೇಲ್ ಲಿಮಿಟೆಡ್ ನಲ್ಲಿ ಮತ್ತು ಆನ್‌ಲೈನ್ ಮುಖಾಂತರ ನೇರ ಮಾರುಕಟ್ಟೆಯನ್ನು ಪ್ರಾರಂಭಿಸಿದೆ. ಇದರಿಂದ ನನ್ನ ಬೇಸಾಯದಲ್ಲಿ ಖರ್ಚು ಕಡಿಮೆಯಾಗಿ, ಒಂದರಿಂದ ಒಂದು ಪೂರಕವಾಗಿ, ನಮ್ಮ ಆದಾಯ ಗಣನೀಯವಾಗಿ ಏರತೊಡಗಿತ್ತು. ಇದನ್ನು ನಾನು ಸಾಮಾಜಿಕ ಜಾಲತಾಣದ ಮುಖಾಂತರ ನಮ್ಮ ಖುಷಿಗಾಗಿ ಸಾರ್ವಜನಿಕವಾಗಿ ವಿಡಿಯೋ ಮುಖಾಂತರ ಹಂಚಿಕೊಂಡೆ. ಇದನ್ನು ಜಿಲ್ಲೆ, ರಾಜ್ಯ ಹಾಗೂ ಹೊರದೇಶಗಳಿಂದಲೂ ನೋಡಿ, ಅವರು ಸಹ ನಮ್ಮ ತೋಟಕ್ಕೆ ಭೇಟಿ ನೀಡಿ ನಮ್ಮ ಮಾರ್ಗದರ್ಶನದಲ್ಲಿ ಅವರ ಜಮೀನಿನಲ್ಲಿ ಅಳವಡಿಸಿಕೊಳ್ಳತೊಡಗಿದರು. ಹೀಗೆ ವರ್ಷದಿಂದ ವರ್ಷಕ್ಕೆ ನಮ್ಮ ಕೃಷಿಯಲ್ಲಿ ಹಲವಾರು ಬದಲಾವಣೆಗಳನ್ನು ಮಾಡುತ್ತಾ, ನಮ್ಮ ಚಿಕ್ಕ ಜಮೀನಿನಲ್ಲೇ ಒಂದು 'ಮಿನಿ ಕೃಷಿ ವಿಶ್ವವಿದ್ಯಾನಿಲಯ'ದಂತೆ ನನ್ನ ಅನುಕೂಲಕ್ಕೆ ತಕ್ಕಂತೆ ನಿರ್ಮಾಣವಾಗಿತ್ತು.
"ಕೃಷಿಯಲ್ಲಿ ತ್ಯಾಜ್ಯ ಎಂಬ ಮಾತೇ ಇಲ್ಲ; ಒಂದರ ತ್ಯಾಜ್ಯವೇ ಇನ್ನೊಂದರ ಜೀವಪೋಷಕ ಅಮೃತ."
ಅಧ್ಯಾಯ ೫ • ರಾಷ್ಟ್ರೀಯ ರುಡ್ಸೆಟ್ ಬೋಧಕರು, ರಾಜ್ಯಮಟ್ಟದ ಪ್ರಶಸ್ತಿಗಳು & ಜರ್ಮನ್ ಡಾಕ್ಟರೇಟ್
ಸಾವಿರಾರು ಯುವಕರಿಗೆ ಬದುಕು ಕಟ್ಟಿಕೊಟ್ಟ ಗುರು & ಅಂತರರಾಷ್ಟ್ರೀಯ ಡಾಕ್ಟರೇಟ್ ಗೌರವ
ಇದನ್ನೆಲ್ಲವನ್ನು ಆಲಿಸಿ ಕೃಷಿ ಅಧಿಕಾರಿ, ವಿಜ್ಞಾನಿಗಳು ಮತ್ತು ಓ.ಡಿ.ಪಿ. (ODP) ಎಂಬ ಸಂಸ್ಥೆ ನನ್ನನ್ನು ಗುರುತಿಸಿ, ರೈತರಿಗೆ ಕೃಷಿ ಬಗ್ಗೆ ಸಂಪನ್ಮೂಲ ವ್ಯಕ್ತಿಯಾಗಿ ತರಬೇತಿ ನೀಡಲು ಮಾರ್ಗದರ್ಶನ ನೀಡಿದರು. ದಿನದಿಂದ ದಿನಕ್ಕೆ ನಮ್ಮ ಬದಲಾವಣೆಯನ್ನು ಕಂಡು, ನ್ಯಾಷನಲ್ ಅಕಾಡೆಮಿ ಆಫ್ ರುಡ್ಸೆಟ್ ನಲ್ಲಿ ಉಪನ್ಯಾಸಕನಾಗಿ ಮಾನ್ಯತೆ ಪಡೆದು, ಕಳೆದ ಮೂರು ವರ್ಷಗಳಿಂದ ರಾಜ್ಯಾದ್ಯಂತ, ವಿದ್ಯಾವಂತ ನಿರುದ್ಯೋಗಿ ಯುವಕ-ಯುವತಿಯರಿಗೆ, ಮಹಿಳೆಯರಿಗೆ, ರೈತರಿಗೆ, ನಿವೃತ್ತ ಅಧಿಕಾರಿಗಳಿಗೆ, ಅಣಬೆ ಮತ್ತು ಸಮಗ್ರ ಕೃಷಿ ಬಗ್ಗೆ ಸಂಪನ್ಮೂಲ ವ್ಯಕ್ತಿಯಾಗಿ ತರಬೇತಿಯನ್ನು ನೀಡುತ್ತಿದ್ದೇನೆ.
ನನ್ನ ಪುಣ್ಯಭೂಮಿಯಲ್ಲಿ, ನಮ್ಮ ತಂದೆ, ನನ್ನ ಪತ್ನಿ ಮತ್ತು ನನ್ನ ಮಗಳು ಎಲ್ಲರೂ ಸಂತೋಷದಿಂದ ಕೃಷಿ ಕಾಯಕದಲ್ಲಿ ತೊಡಗಿ ಕೃಷಿಯಲ್ಲಿ ಖುಷಿಯನ್ನು ಕಂಡುಕೊಂಡಿದ್ದೇವೆ. ನಮ್ಮ ಎಲ್ಲಾ ಕೃಷಿ ಚಟುವಟಿಕೆಗಳನ್ನು ಗಮನಿಸಿ, ಕೃಷಿ ಇಲಾಖೆ ಮತ್ತು ಕೃಷಿ ವಿಶ್ವವಿದ್ಯಾನಿಲಯಗಳು, ತಾಲೂಕು, ಜಿಲ್ಲೆ, ರಾಜ್ಯ ಮಟ್ಟದ 'ಕೃಷಿ ಸಾಧಕ ಪ್ರಶಸ್ತಿ'ಯನ್ನು ನೀಡುವುದರ ಜೊತೆಗೆ, ಹಲವಾರು ಸಂಘ-ಸಂಸ್ಥೆಗಳು ನೂರಾರು ವೇದಿಕೆಗಳಲ್ಲಿ ಗೌರವಿಸಿ ಸನ್ಮಾನಿಸಿವೆ. ಜೊತೆಗೆ ಜರ್ಮನ್ ಯುನಿವರ್ಸಿಟಿಯಿಂದ ನಮ್ಮ ಕೃಷಿ ಬದಲಾವಣೆಯ ಸಾಧನೆಯನ್ನು ಕಂಡು ಕೃಷಿ ವಿಭಾಗದಿಂದ ಗೌರವಾನ್ವಿತ 'ಡಾಕ್ಟರೇಟ್ ಪದವಿ' ಪುರಸ್ಕಾರವನ್ನು ಕೊಟ್ಟು ಗೌರವಿಸಿದೆ.
"ಒಬ್ಬ ವ್ಯಕ್ತಿಗೆ ಸ್ವಂತ ಕಾಲ ಮೇಲೆ ನಿಲ್ಲುವ ಕೌಶಲ್ಯ ನೀಡುವುದೇ ನಿಜವಾದ ಸೇವೆ; ಜರ್ಮನ್ ಡಾಕ್ಟರೇಟ್ ಇಡೀ ರೈತ ಸಮುದಾಯದ ಪರಿಶ್ರಮಕ್ಕೆ ಸಿಕ್ಕ ಮನ್ನಣೆ."
ಅಧ್ಯಾಯ ೬ • ಸೃಜನಶೀಲ ಹವ್ಯಾಸಗಳು, ರಾಗಿ ಕೇಕ್ ಸಂಭ್ರಮ & ನಿಸ್ವಾರ್ಥ ಸಮಾಜ ಸೇವೆ
ರಾಗಿ ಕೇಕ್, ತರಕಾರಿ ಕಲೆ, ಗಿಡ ನೆಡುವ ಸಂಕಲ್ಪ & ಸಂಕಷ್ಟದಲ್ಲಿರುವ ರೈತರಿಗೆ ಆಸರೆ
ನನ್ನ ಕೃಷಿ ಕಾಯಕದ ಜೊತೆಗೆ ಇತರ ಚಟುವಟಿಕೆಗಳು ನನ್ನ ಜೀವನದಲ್ಲಿ ಗರಿಗೆದರಿವೆ. ಸ್ಥಳೀಯವಾಗಿ ಸಿಗುವ ಹೂ-ಎಲೆಗಳಿಂದ ಸುಂದರ ಹೂಗುಚ್ಛ ತಯಾರಿಸುವುದು, ನಮ್ಮ ಹುಟ್ಟುಹಬ್ಬ ಹಾಗೂ ಕುಟುಂಬದ ಸದಸ್ಯರ ಹುಟ್ಟುಹಬ್ಬಕ್ಕೆ ರಾಗಿ ಕೇಕ್, ಕಲ್ಲಂಗಡಿ ಹಣ್ಣಿನ ಕೇಕ್, ಕೇಸರಿ ಬಾತ್ ಕೇಕ್ ತಯಾರಿಸಿ ಸಂಭ್ರಮಿಸುವುದು, ಹಣ್ಣು-ತರಕಾರಿ ಮತ್ತು ಧಾನ್ಯಗಳನ್ನು ಬಳಸಿ ಕಲಾತ್ಮಕ ಚಿತ್ರ ಬಿಡಿಸುವುದು ನನ್ನ ಪ್ರೀತಿಯ ಹವ್ಯಾಸಗಳು. ಇವೆಲ್ಲವನ್ನೂ ಸ್ಥಳೀಯವಾಗಿ ನಡೆಯುವ ಸಭೆ-ಸಮಾರಂಭಗಳಲ್ಲಿ ಭಾಗವಹಿಸುವ ಗಣ್ಯರಿಗೆ ತರಕಾರಿಗಳನ್ನು ಒಗ್ಗೂಡಿಸಿ 'ಸನ್ಮಾನಿತ ಬುಟ್ಟಿ'ಯನ್ನು ನೀಡಿ ಗೌರವಿಸುತ್ತೇವೆ.
'ಸಂತೋಷ ಸಂಭ್ರಮಕ್ಕೊಂದು ಗಿಡ' ಎಂಬಂತೆ ನಮ್ಮ ಜನ್ಮದಿನ ಹಾಗೂ ವಿಶೇಷ ದಿನಗಳಲ್ಲಿ ಸಾರ್ವಜನಿಕವಾಗಿ ಅಲ್ಲಲ್ಲೇ ಗಿಡಗಳನ್ನು ನೆಟ್ಟು ಪೋಷಿಸುವುದು, ಪರಿಸರ ಸ್ವಚ್ಛಗೊಳಿಸುವ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವುದು, ರೈತರಿಗೆ ಅನುಕೂಲವಾಗುವ ಸಭೆ-ಸಮಾರಂಭಗಳಿಗೆ ನಾವು ಭಾಗವಹಿಸುವುದಲ್ಲದೆ ಇತರ ರೈತರನ್ನೂ ಕರೆದೊಯ್ಯುವುದು, ಬಿಡುವಿನ ಸಮಯದಲ್ಲಿ ಶಾಲೆಗಳಿಗೆ ತೆರಳಿ ಮುಖ್ಯೋಪಾಧ್ಯಾಯರ ಅನುಮತಿ ಪಡೆದು ಶಾಲಾ ಮಕ್ಕಳಲ್ಲಿ ಕೃಷಿ ಬಗ್ಗೆ ಅರಿವು ಮೂಡಿಸುವುದು, ವರ್ಷಕ್ಕೆ ಒಂದೆರಡು ಬಾರಿ ಕುಟುಂಬ ಹಾಗೂ ರೈತರೊಡನೆ ಕೃಷಿ ಪ್ರವಾಸ ಕೈಗೊಳ್ಳುವುದು, ಹಾಗೂ ಸಂಕಷ್ಟದಲ್ಲಿರುವ ರೈತರಿಗೆ ಉಚಿತವಾಗಿ ತರಬೇತಿಗಳನ್ನು ನೀಡಿ ಅವರಿಗೆ ಅವಶ್ಯಕತೆ ಇರುವ ಬಿತ್ತನೆ ಬೀಜ ಹಾಗೂ ಕೃಷಿ ಪರಿಕರಗಳನ್ನು ನನ್ನ ವೈಯಕ್ತಿಕ ಹಣದಿಂದಲೇ ಕೊಟ್ಟು ಸಾರ್ವಜನಿಕವಾಗಿ ಕಷ್ಟದಲ್ಲಿರುವವರಿಗೆ ಸಹಾಯ ಹಸ್ತ ಚಾಚುತ್ತಿದ್ದೇನೆ.
"ಸಂತೋಷ ಸಂಭ್ರಮಕ್ಕೊಂದು ಗಿಡ — ನೊಂದ ರೈತನಿಗೆ ಆಸರೆಯಾಗಿ, ಮಣ್ಣಿಗೂ ಮನುಷ್ಯನಿಗೂ ನಿಸ್ವಾರ್ಥ ಪ್ರೀತಿ ನೀಡುವುದೇ ಬದುಕಿನ ನಿಜವಾದ ಸಾರ್ಥಕತೆ."
